سوهاج : حمدى صابر أحمد
قال الدكتور أحمد حمدى مدير مجازر سوهاج ردا على الوقفه الاحتاجية التى قام بها عدد من الجزارين اعتراضا على مجزر اخميم لبعد المسافه دى خطة من الدولة لتطوير المجازر تقريبا 420 مجزر على مستوى الجمهورية. وأضاف لما سألونا عن سوهاج إخترنا مجزر سوهاج العمومى ومجزر أخميم العمومى لان عليهم ضغط وأكثر المجازر ذبح، وللحظ الأثنين عليهم مناقصة لكن أخميم خلص بدرى بدرى علشان كده بدوأ يعرضوه للتطوير والشركه اللى استلمته تبع جهاز وزارة الاسكان. وأكد الجزارين عندهم حق يعترضوا لان فى عطلة فعلا وتم توزيعهم على المجازر الفرعيه الصغيرة فى القرى وإستيعابها صغير ومش هيسعف بس لازم المطالبة بحقهم تكون بشكل منظم وقانونى علشان ينفذوا مطالبهم، اولا كويس انهم توجهوا للوحدة المحلية لان الوحدة المحلية هى اللى بتدير المجزر ماليا واداريآ وبكده رئيس الوحدة المحلية هيخاطب الجهات المسؤلة عن تطوير المجزر ويحاول يسرع فى الخطوات سواء التعثر من المقاول او الدعم المالى ويحاول الوصول للمشكلة وحلها. إحنا كجهة طب بيطري مش بنتأخر عن الجزارين بأى شكل لاننا موفرين دكاترة وهما قالوا كده أن الدكتور بيروحلهم من 1 بليل "وانا مش بخلى الدكتور ينام" وموفرين أختام، بس الجزار مفكرش ان الدكتور بيتعب زيه ويروح من واحده بليل، وزى ماهما تعبانين إحنا كمان تعبانين ونفسنا مجزر اخميم يخلص بكرا ومجزر سوهاج يخلص امبارح نفسنا المجازر دى تنتهى وتتطور ويبقى عندنا احسن مجازر علشان نطلع لحوم صحيه، بخصوص مجزر الكوثر اللى بيشتكوا منه اللى على بعد 50 او 60 كيلو زى ما بيقولوا وان هو هيبطأ عملية الذبح الكلام ده غير واقعى تماما، لان مجزر الكوثر الآلى ده بدوأ فيه من 2012 وحصل تعطيلات فى اكثر من حاجه ولسه يادوب بيحاولوا يخلصوه ومحدش قالهم روحوه لانه لسه مشتغلش ومين وجهلهم اى استفسار او تعليمات انهم يتوجهوه لمجزر الكوثر. ومشكلة مجزر الكوثر مطلبناش منهم انهم يرحوه لاننا لسه مشغلناهوش ومستلمنهوش وفنيا كطب بيطرى لسه موافقناش عليه لان عندنا لسه ملاحظات عليه، لكن بقول لحضرتك فعلا ان ليهم حق يعترضوا على المسافه او غيره ده حقهم وظروفهم، واحنا معندناش مشكله ومستعدين نساعدهم وفي ظهرهم فى اى مكان كان، واحنا جاهزين كطب بيطرى بدكاترتنا وبالإداريين وإدارة المجازر والمديرية كلها إن نخدمهم ف اى مكان، بدليل اننا كنا من 6 الصبح فى المجزر اللى بيقولوا عليه بعيد بنجربه وبنحاول نشغله وبنحاول نشوف إيه ناقصه، سواء راحوه او لا لان محدش يقدر يجبر جزار يروح مكان معين.