بقلم : مني الحديدي
عايشين في الدنيا نتعلم منها دروس ونعلم غيرنا دروس بالمواقف اللي بنمر بيها
بنقابل نماذج لناس كتير في حياتنا منهم اللي بنفرح معاهم وبنحس اد ايه الدنيا جميلة بوجودهم في حياتنا بيهونوا علينا اي حاجه صعبه في حياتنا بيطبطبوا علي قلوبنا وقت الوجع والالم
وبنقابل ناس اد ايه بيكون مجرد انك تشوفها تصاب بقبضة في القلب ناس مش مريحة تشعر فيها بقلوب مش صافية ولا نقية ..ناس تزعل لو شافتك مبسوط او ناجح ناس تحب اللي يكرهك وتصاحب اللي يؤذيك
وكمان بنقابل ناس ممكن تعرفك بس لمصلحتها ممكن تكون انت سبب لسعادتها او صدر حنين بيرموا فيه همومهم بس لما تكون محتاج ليهم مش بتلاقيهم
نماذج كتير من البشر بنقابلهم في حياتنا بيأثروا فينا وبيسيبوا علامة في قلوبنا وعقولنا
وبيجي وقت علي الانسان انه لازم ياخد قرار بالبعد
احيانا بيكون القرار بالبعد مميت ومؤلم وبكاء القلب وصرخاته يكاد يأخذ الانسان الي الموت عند الناس الطيبه اللي مابتعرفش تكره ودايما قلبها مليان خير لكل اللي حواليها
ماتترددش ابدا انك تاخد قرار بالبعد عن
اى حد هونت عليه ولو لمرة واحدة هاتهون عليه الف مرة
إبعد عن الناس القاسية اللي مالهمش عزيز ولا غالي
ابعد عن اي حد حاولت تقربلة وتطيب بخاطره وكسر بخاطرك
ابعد عن اى حد ما قدرش ولافهم انك سامحته مره واتنين عشان معزته عندك ودايما شايفك ساذج
ابعد عن الناس اللى شايفه نفسها ما بتغلطش ودايما صح …ابعد عن اللى طبعه مش طبعك لأن الطبع عمره ما بيتغير وإللي مالوش اصل ولا كبير هيصغرك وهيقل منك قدام نفسك قبل مايصغرك ادام الناس
ابعد عن اللى اختار صاحب غير صحبتك وفضل متعته الشخصية عليك وداس علي عشرتك وطيبتك
ابعد عن اي حد أنانى مش شايف غير نفسه وبس
ابعد عن عن الكذاب والخاين عمره ما هيكون مخلص لأن الإخلاص بيكون في دم الانسان ومتأصل في طبعه ومفيش رقيب عليه الا الضمير…ابعد عن اى حد بيجيب سكينه يحطها فى جرحك علشان يوجعك
ابعد عن اللي حاولت تقربلة وتطيب بخاطره وتطبطب علي قلبه وكسر بخاطرك..ابعد عن اى حد احتاجته فى شدتك وعمرك ما لاقيته
ابعد لما ماتلاقيش حنيه ولالهفه ولا اهتمام ولا تقدير… ابعد عن الناس اللى فى وجودها هتحس انك وحداني ودنيتك فاضيه
ابعد ما تترددش وماتفكرش كتيرلانك تستاهل الأحسن تستاهل اللي يعرف قيمتك ويقدرك ويصونك ف قلبه ويشيلك ف عينيه
ولما تاخد قرار بالبعد ابعد من غير ما تعاتب لان العتاب ده للناس اللى لسه باقي عليها
خليك باقي على اللى باقى عليك بس
ولما تنسحب من حياة ناس مش مقدرينك وخانوا عشرتك دي مش نداله منك لا دي منتهي القوه والجدعنه مع نفسك
اتعلق بربنا وحب نفسك واتعلق بيها وباللي يسعدها لان نفسك عمرها ماهتخونك ولاهتهون عليها ولا ربنا هيرحل ويسيبك .