بقلم : الدكتور أحمد حمدي
الفراخ البيضا الأمهات فراخ إنتاج البيض بشوفها كتير في محلات الفراخ وسعرها بيكون أرخص من فراخ التسمين المخصصة للأكل الآدمي
وفي الأسواق المصرية بيتم عرض الفراخ الأمهات للمستهلك برغم إن ده ممنوع في الدول الأوربية
طب ليه.... هقولك
الفراخ الأمهات بتبدأ في إنتاج البيض عند عمر 18 إلى 20 أسبوع علشان تنتج بيض كبير الحجم بحيث تنتج الفرخة الواحدة من 160 إلى 200 بيضة سنوياً تحت الرعاية والتغذية الجيدة والتي تنشط إنتاج البيض وليس إنتاج اللحم
وبعد سنة وشهرين بيتوقف المبيض عن العمل وبيتم إعدام الفراخ دي في كل دول العالم إلا مصر لأن بيتم إعادة تنشيط المبيض(عملية القلش) بحيث يعمل 6 شهور أخرى وبكده هيصل عمر الفرخة لسنتين تقريباً.
وطبعاً خلال الفترة الطويلة دي بتاخد في مضادات حيوية وهرمونات
ده غير إن مع تقدم السن بيزيد محتوى الدهون على حساب المحتوى البروتيني والأنسجة بتبقى خشنة وبتاخد فترة أطول في التسوية وطبعاً القيمة الغذائية أقل بكتير من فراخ التسمين اللي عمرها مش بيتجاوز 40 يوم.
ملحوظة : الامهات (العتاقي) البلدي المتربية في المنزل مبتكونش طبعا واخده كل كمية المضادات الحيوية ومركزات الاعلاف زي الفراخ البيضا
الخلاصة:
بلاش تشتري الفراخ العتاقي البيضا علشان كمية الدهون اللي فيها كتيرة وقيمتها الغذائية أقل بكتير من فراخ التسمين
ده غير انسجتها الخشنة ومدة التسوية الطويلة.
ودورات الأدوية والتحصينات اللي واخداها كتيرة جداً وميغركش حجمها الكبير وسعرها الرخيص.