بقلم : الدكتور أحمد حمدي
أوعى تفتكر إنك لما تدخل بعلاقاتك أو وضعك وسط قريتك في إنك تفشل الحملة فأنت كده تبقى الكبير. أوعى تفتكر إنك لما تدافع عن جزار بيعرض لحوم مخالفة إنه بعد كده هيتوب وهيمشي ع الصراط المستقيم. أوعى تفتكر إن أنت وأولادك مش هتاكلو من اللحمة دي بالعكس أنت وكل حبايبك ممكن تستهلكوها وتبقو أول المضرورين للأسف المشكلة مازالت قائمة واعتقد مالهاش حل الناس في القرى تشتكي من الذبح في الشارع واللحوم المريضة والكبيرة في السن او حتى اللي دون السن. ده غير التلوث في الشوارع وانتشار الامراض. إلا إنك لما تستجيب وتنزل حملة هتلاقي أول ناس يعترضوك هم اهل القرية نفسهم. ويا حبذا لو فيهم ( عبده مشتاق) لكرسي في المجلس.. تلاقيه تزعم ثورة ضد الحملة وأثار الناس ضدنا وجمع الناس حواليه قال إيه تعالو شوفوني وانا بدافع عنكم. ساعتها الحملة كلها بتتعرض للخطر حتى لو كانت جيوش بتحميها. وكمان بتخلي الجزار أو أي فاسد يتمادي في مخالفاته ..وكله على حساب اهلك وجيرانك..وكل قريتك وتبقى ساعتها عامل زي الدبة اللي قتلت صاحبها.... قتلته بحجة إن قصدها تحميه.. لكن بغبائها...... قتلته