بقلم : الدكتور أحمد حمدى
لازم كلنا نتحد سواء مسئولين مواطنين ، تجار ، وجزارين لمصلحة بلدنا في خلال الأيام دي لأن فيه جزارين ممكن تقفل محلاتها أو ما تفتحش كل يوم بسبب الخسارة اللي بيعانوا منها
بقترح يكون فيه منافذ ومجمعات بيع لحوم فريش ومبردة ومجمدة توفرها الدولة ويعرض فيها الجزارين اللحوم بتاعتهم بديلة لمحلاتهم الخاصة
لان ده هيخفف من عليهم تكاليف المحلات بكل بنودها
وكمان هنتمكن من الرقابة والسيطرة على جودة وسعر اللحوم المعروضة بشكل أكبر
ممكن نفكر في تحديد أيام معينة لعرض وبيع اللحوم في الأسواق (ماتبقاش كل يوم) وده هيقلل برضو من تكاليف تجار وجزارين اللحوم وهيقلل الطلب على الحيوانات الحية وبالتالي المعروض هيزيد وبكده على الأقل هنثبت السعر شوية ده غير إنه هيساعد في تغيير ثقافة وعادات المصريين في إيجاد بدائل صحية للحوم خلال باقي الأيام خاصة وإحنا داخلين على شهر رمضان الكريم .
طبعاً أنا بعرض حلول سريعة وقصيرة الأمد مش طويلة الأمد علشان مفيش حد يعلق ويقولي أسعار الأعلاف أو غيره
إحنا بنواجه أزمة عالمية ولازم كلنا ننحي المصالح الشخصية ونفكر بس في مصلحة بلدنا