بقلم الدكتور احمد حمدى
بحكم تخصصي في اللحوم وكل ما بقابل ناس دايماً يسألوني عن سبب ارتفاع سعر اللحمة
لازم نعرف الأول وبما يرضي الله إن الجزارين من أكتر الناس المضرورين في ظل إرتفاع أسعار اللحمة
وإن الجزار من مصلحته إن سعر اللحمة يرخص ويكون في متناول الجميع لأن بالشكل ده هو هيبيع أكتر ومكسبه هيكون أكتر
بالبلدي كده( السكينة هتشتغل )
وبكده وخاصة في اللحوم هتلاقو البايع والمشتري بيشتكو
طب سعر اللحمة وصل في سوهاج 200 جنيه ( وده قبل أعياد المسيحين ورمضان المسلمين) يعني كمان ممكن يزيد عن 200 جنيه خلال الفترة الجاية
هنفهم مع بعض تسعيرة اللحمة بتتحسب ازاي عند الجزارين
أولاً السوق بقى بيفتقر للعجول البلدي وده نتيجة عوامل كتيرة محتاجة مقال لوحده لكن معظم اللي بيتم دبحه في مجازرنا في الوقت الحالي هي العجول المستوردة ( المتربية هنا)
طب لو جزار مثلاً دبح بلدي
سعر كيلو القايم (الكيلو للحيوان حي) حالياً في البقر من 80وبيوصل 82 جنيه (ع حسب التاجر والسعر اللي بيقدره للعجول بتاعته) ونسبة التصافي في البقر (عدد الكيلوهات من اللحوم بعد استبعاد العظام والأحشاء الداخلية) بيكون 47%
-سعر القايم الجاموس سوهاج من 70 إلى 73 جنيه ونسبة التصافي 42%
بالنسبة للعجول المستوردة ودي بصراحة فيها سلالات كتيرة وجودتها مختلفة لكن هنفترض الأفضل منهم واللي سعر القايم بيوصل ال90 جنيه لكن نسبة التصافي بتتخطى ال50%
سعر الكيلو للجمهور بيحسبه الجزار ازاي
(سعر الكيلو قايم ويضربه في 2 )
وبعدين يضيف عليه مصاريف نقل وصنايعية وخلافه 10جنيه
يعني لو سعر القايم 80
80×2=160
160+10=170
يعني في الحالة دي الجزار بيبيع الكيلو العادي (مش صافي)ب 170
-أما بقى الكيلو الصافي ممكن يوصل ل 190 و200 جنيه حسب طلب الزبون
مشكلة الجزارين برضو إن المربيين بيبيعو للأعلى سعر وعلشان كده التجار من القاهرة ممكن ينزلو السوق في سوهاج ويشترو بأعلى سعر وعلشان كده بنلاقي سعر كيلو اللحمة في القاهرة ممكن يعدي ال200 جنيه وده طبعاً لأن الجزار عنده الطلب أعلى نظراً للكثافة السكانية الأكبر
الحل في وجهة نظرهم هو إن أصحاب المعالف الكبيرة يبيعوا بس للجزارين داخل المحافظة
طبعاً سعر لحوم الإناث واللي بتدبح بطريقة غير شرعية في الأرياف خارج السلخانات بيبقى أرخص بكتير لأن جودته هتكون أقل وبدون اشراف طبي يعني سلامته مش مضمونه يعني المشكلة هي مشكلة عرض وطلب وسوق طب والحل
هو إن أصحاب المعالف الكبيرة والمتحكمين في سوق المواشي في سوهاج يقعدو مع ممثلين للجزارين تحت رعاية الغرفة التجارية أو التموين ويوصلو لحلول ممكن تكون في صالح المواطن في سوهاج