بقلم : الدكتور أحمد حمدى
اللحوم السودانية مبتختلفش في قيمتها الغذائية عن اللحوم البلدية نفس نسبة البروتين وكمان نسب قريبة في الدهون الفرق بس انها مبتوصلكش طازجة، فبيكون الطعم مختلف شوية عن البلدي .
بس أنا هقولك إنك دلوقتي كمان معظم المعروض في المحلات مستورد وانت بتشتريه على إنه بلدي!!.
طيب ليه السوداني طعمه بيختلف ؟؟!!
هقولك:
لأنه يتغذى على المراعي الطبيعية وكمان بيتحرك أكتر في المساحات الكبيرة اللي بيتربى فيها وعلشان كده طبيعة عضلاته هتختلف عن البلدي اللي بيبقى محبوس في المعلف أو المزرعة فحركته محدودة جداً وكمان بيتغذى على أعلاف مركبة ومصنعة
طيب ومن الناحية الطبية ؟؟!!
هقولك برضو:
بالعكس العجول السوداني صحياً أفضل لأنها بتتغذى على المراعي الطبيعية وكمان المجازر والإشراف الطبي جيدين جدًا في السودان لأن الثروة الحيوانية هناك تمثل نسبة كبيرة من الاقتصاد السوداني ده غير إن السودان بتصدر لدول عربية زي السعودية والإمارات وأوروبية كمان .
طيب نسأل هو سعر كيلو اللحمة السوداني كام ؟؟
تكلفة تربية العجول السوداني بسيطة جدًا بالنسبة للمربيين هناك لأنه سايبها تأكل في المراعي الطبيعية فسعرها هيكون أقل بكتير من أسعار العجول هنا.
وكمان اللحمة وسعرها هيختلف باختلاف عمر الحيوان لأنه لو الأعمار أقل من سنتين هيبقى لحمتها أقرب جدا للبلدي عندنا
وسعر الكيلو لن يتعدى الـ120جنيه للمستهلك بأي حال من الأحوال.
في النهاية ظل ارتفاع اسعار اللحوم في مصر ف اللحوم السوداني المبردة هي أفضل بديل في الجودة والسعر