بقلم : الدكتور أحمد حمدى
في أسواق المواشي وفي كل المحافظات هتلاقي تجارة الحمير وسعر الحمار السليم في الاسواق بيتراوح مابين 800 ل 1300 جنيه حسب حالته الصحية والجسمانية
ولو قربت شوية من تجار الحمير هتلاقي وسطهم كده واحد أو اتنين بيشترو الحمير التعبانة أو المعيوبة
ايوه.. وده في الحقيقية مش منطقي لأن المفروض أنا بشتري الحمار السليم علشان أقدر أحمل عليه أو يجر عربية مثلاً
لكن التاجر اللي بيشتري الحمار الكسر ده هو اللي تبدأ تدور وراه
طبعاً تجارة وبيع وتداول الحمير مافيهاش مخالفة قانونية.
وعلشان كده بتلاقي التاجر ده يشتري الحمار ب 100 أو 150 جنيه ويخرج بالحمير اللي اشتراها من السوق بمنتهى الأمان
يبدأ يجمعهم في مكان معين يخصه... وبعد كده تيجي العربيات تحمل.
يبيع الحمار من دول ب 300 إلى 500 جنبه...
فيه تجارة قانونية للحمير الكسر اللي زي دي وهي إنهم يستخدموهم لتغذية الحيوانات المفترسة زي جنينة الحيوانات أو السيرك وغيره
أما بقى التجارة الغير قانونية وهي تجارة جلود الحمير بأنه ياخد كمية الحمير دي على أي ظهير صحراوي بعيد عن الرقابة ويبدأ يدبح أو يقتل الحمير بغرض سلخها واستخراج الجلود منها.
جلد الحمار بيتم تصديره للصين ب 1000 دولار تقريباً.
وسعره العالي ده نتيجة إنه بيدخل في صناعات مهمة زي:-
المنشطات الجنسية .... مستحضرات التجميل.... استخراج الكولاجين واهميته في إزالة تجاعيد البشرة ... يستخلص منه بعض المواد التي تدخل في صناعة أدوية النزيف وعلاج فقر الدم ...
بخلاف استخراج مادة الجيلاتين واستخداماتها المتعددة.
جدير بالذكر أن هناك تصدير شرعي لجلود الحمير وذلك تحت اشراف الهيئة العامة للخدمات البيطرية نتيجة تصدير جلود الحمير المستخدمة لغذاء الحيوانات المفترسة في حدائق الحيوان العامة.
