احمد حمدى الشبح
مصر كلها في الأيام الأخيرة بتتكلم عن الأضاحي ولحمة الأضاحي ولكن التساؤلات والتخوفات من مرض اسمه الحمى القلاعية منتشر في الحيوانات وده اللي مخلي كل واحد محتار ياترى هعمل إيه ؟ وهشتري منين ؟ وإيه هو مرض الحمى القلاعية ده ؟وإيه مدى أضراره ؟
اسمحولي اشرحلكم وأرد على كل تساؤلاتكم من وجهة نظر طبيب مجازر واعتقد ده اللي هيهم معظمكم.
مرض الحمى القلاعية هو مرض فيروسي بيصيب الأبقار والجاموس والأغنام والماعز وكل حيوان ب ظلف مشقوق
أعراضه هي التهابات في الفم واللسان وهتلاقي اللعاب بيسيل من فم الحيوان بكثافة ده غير برضو التهابات في الضرع والأقدام وبيسبب عرج أو صعوبة في الحركة ده غير كمان فقدان الشهية نتيجة التهابات الفم وقلة إدرار اللبن نتيجة التهابات الضرع .
سؤالك المتوقع هنا هو هل بينتقل للإنسان ؟
نادر جدًا جدًا ولكن خطورته الحقيقية بتكمن في تأثيره على الثروة الحيوانية
بينتقل ازاي ؟
عن طريق ملامسة اللعاب او التلوث بالبراز أو استنشاق الفيروس من الهواء ؟
طب واللبن واللحمة ؟
لو متمش غليهم بدرجات حرارة كافية بينتقل لكن تأثيره على الإنسان ضعيف جدا لكن الخوف من البكتريا المسببة للأمراض اللي بتنمو في لحوم الحيوانات المريضة.
وده بيختلف عن مرض اخر بيصيب الانسان اسمه حمى اليد والفم والقدم لكن مش اللي بيصيب الحيوانات
أشتري ازاي الأضحية؟
وأنت بتشتري حيوان الأضحية لازم ميكونش هزيل ولا درجة حرارته مرتفعة وكمان مفيش لعاب كثيف سايل من فمه وحركته طبيعية وحيوية وأقدامه سليمة
طيب لو هشتري لحمة أعرفها ازاي ؟
اللحمة المصابة بتكون محتقنة ولونها داكن ولو هتحطها في مياه لون المياه هيبقى احمر ولما هتتغلي هيطلع ريحة وحشة .
هل فيه مكان مضمون اشتري منه ؟
أي جزار ثقة بيكون بيدبح في المجزر اشتري منه لأن أطباء المجازر بيكشفو على الحيوان قبل وبعد الذبح
هل فيه طريقة أضمن بيها أكتر ؟
تسوية اللحمة بشكل جيد وتعريضها لدرجات حرارة مرتفعة لقتل أي ميكروب
إيه اللي أبعد عنه في الأكل كوقاية وأريح دماغي ؟
لو عايز تريح نفسك بلاش لحمة الرأس والأحشاء والكوارع .