كتبت : بسنت محمود
حل النجم عمرو يوسف ضيف في برنامج الإعلامية أسما إبراهيم في برنامج "حبر سري"، وذلك عبر قناة القاهرة والناس.
كشف النجم عمرو يوسف خلال الحلقة عن الأزمة التى حدثت في حفل زفافه بين شيرين عبد الوهاب وعمرو دياب وعن حقيقة ضربه لـ عامل في مهرجان الجونة.
تحدث الفنان عمرو يوسف عن أزمة تصريحات شيرين خلال حفل زفافه عن عمرو دياب قائلًا:"عمرو دياب نجم كبير وشيرين صوت مصري أصيل رائع مليان إحساس غير طبيعى ونجمة كبيرة جدًا، لو عندى لوم وعتاب على حد فـ أنا عندى عتاب على اللى نزل الفيديو".
كما كشف تفاصيل الشائعات التي انتشرت ومتعلقة بضربه لـ عامل في خلال مهرجان الجونة ورد قائلا: "تعرضت لظلم شديد وأغلبية الوقت مش برد وأول مرة اتكلم عن الموضوع ده واللي حصل أن نزل خبر أنى ضربت على عامل عشان طلب يتصور معايا، ومش متخيل إزاي حد يصدق حاجة زي كده أني أضرب شخص نفسه يتصور معايا وده عبث".
ووضح عمرو يوسف: "الحقيقة كنا معزومين على العشاء في ثالث ليلة من أيام المهرجان وكنا 20 شخص على الترابيزة والولد ده كان حاطط كاميرا التليفون على صدره وبيصور وبيبص يمين وشمال بخبث، ذهبت وقلت له بتعمل أي خاف وساب الفن وجري وطلعت بره لقيت الولد واقف بره وقلت له افتح الفون خاف وطلع يجري".
وتابع: "واحد من زميله جه وفتح لي التليفون لقيته مصور لايف 3 دقائق ودخلت بصيت على فونه لقيت بلاوي على التليفون، وخليت التليفون معايا وثاني يوم خاله اتصل على الفون وردت عليه وبيقولي أنا عرفت القصة وأنا بعتذر لك وأمه كلمتني واعتذرت لي وقالت لى ابني نفسه يمثل وهو كل يوم بيعمل لنا مشكلة".
واستكمل: "أمه كانت خايفة ابلغ عنه والتليفون كان فيه حاجات تحبسه وتوديه في ستين داهية والتليفون كان كارثة، وقلت لهم أنا همسح التليفون بالكامل وهرجع لكم التليفون والولد غلطان 100% ، وطلع بعدها إشاعة أنى أنا اللي ضربته وده محصلش خالص".
فاجأة النجم عمرو يوسف خلال الحلقة الإعلامية أسما إبراهيم بسؤال عندما قالت له لو قررت ترجع مذيع ما هو السؤال التى سوف تسأله لى ورد قائلًا:" مين أكتر ضيف جالك وبعد ما قومتي قولتى لا مش دى الشخصية اللى كنتى متوقعاها لا أنا كنت بحبه أو بحبها، وبعد ما عرفته أو عرفتها على الحقيقة محستش بنفس الإحساس".