بقلم : الدكتور أحمد حمدى
ما حدث الأيام الماضية، فى الأسواق العامة من اشتعال لأسعار اللحوم أدى إلى دخول المواطن فى دوامة من الحيرة
وأصبحت الأسر المصرية تعلن حالة الطوارئ وشد الأحزمة على البطون لكى تستطيع مواصلة الحياة.
يا ترى الناس عايشة ازاى؟!!.. وبتاكل إيه؟!!.. فبعد ارتفاع أسعار اللحوم والفراخ أصبح الجميع يمشى محدثًا نفسه عن الزيادة الرهيبة التى لحقت باللحوم ولا يستطيع أى بيت مصرى تحملها فأصبح طعام المصريين خاليا تماما من الدسم ومن اللحوم البيضاء والحمراء بعد ارتفاع أسعارهما، فكيلو اللحوم أصبح بـ160 جنيها وكيلو الفراخ بـ35جنيها.. أما متوسطو الحال فكيلو لحم كفاية عليهم فى الشهر ويكتفون بالسلع الضرورية.
حدث معى بالفعل من كام يوم وأنا في حملة تفتيش أحد أصحاب محلات المجمدات بيقولي الناس بقت تشتري الاجنحة علشان مش قادرة على تمن الفرخة ..وياريت بنقدر نوفرلهم كل الكميات المطلوبة
وامبارح واحدة ست جاية لمحل الجزارة علشان تشتري عضماية(ماسورة) وفوجئت الجزار بيبيعها ب ١٠ جنيه كمان
وده اللي بصراحة خلاني لازم أفكر معاكم في حل .
أولا : ولو عايزين نفكر صح يبقى منتهمش الجزار في الأزمة دي لان الجزار ده حلقة واحدة من السلسلة الطويلة واللي بتبتدي من ارتفاع سعر الأعلاف على المربي لحد ما توصلنا اللحمة عن طريق الجزار .
بالعكس من وجهة نظري إن الجزارين مضرورين من الغلاء ده لان معدل بيعهم أقل وبيشترو الحيوان حي بسعر مرتفع جدا وكمان نسبة التصافي مبتوصلش ال٤٨٪ بحد أقصى في البقر و٤٥٪ في الجاموس
وحتى دلوقتي العجول المستوردة بقى سعر الكيلو الحي منها (القايم) بيساوي البلدي وممكن يزيد في بعض السلالات عن البلدي
والمربي أو الفلاح بقى سعر الأعلاف بالنسباله غالي في ظل الارتفاع العالمي للاسعار بشكل عام وده بيخليه يقلل من جودة الاعلاف أو يرفع السعر على التاجر .
طب إيه الحل
من وجهة نظري المتواضعة الحل في اللحوم السودانية سواء حية أو مبردة أو حتى مجمدة
وتعالو نفكر مع بعض بشكل منطقي وعلمي
اللحوم السودانية مبتختلفش في قيمتها الغذائية عن اللحوم البلدية نفس نسبة البروتين وكمان نسب قريبة في الدهون
الفرق بس انها مبتوصلكش طازة
ف الطعم مختلف شوية عن البلدي
بس أنا هقولك إنك دلوقتي كمان معظم المعروض في المحلات مستورد وانت بتشتريه ع إنه بلدي
طب ليه السوداني طعمه بيختلف
هقولك
لأنه بيتغذى ع المراعي الطبيعية وكمان بيتحرك اكتر في المساحات الكبيرة اللي بيتربى فيها وعلشان كده طبيعة عضلاته هتختلف عن البلدي اللي بيبقى محبوس في المعلف أو المزرعة فحركته محدودة جداً وكمان بيتغذى على أعلاف مركبة ومصنعة
طيب ومن الناحية الطبية
هقولك
بالعكس العجول السوداني صحياً أفضل لأنها بتتغذى على المراعي الطبيعية وكمان المجازر والإشراف الطبي جيدين جدآ في السودان لأن الثروة الحيوانية هناك بتمثل نسبة كبيرة من الاقتصاد السوداني ده غير إن السودان بتصدر لدول عربية زي السعودية والإمارات واوروبية كمان .
طيب نسأل هو سعر كيلو اللحمة السوداني كام
تكلفة تربية العجول السوداني بسيطة جدآ بالنسبة للمربيين هناك لانه سايبها تاكل في المراعي الطبيعية ف سعرها هيكون اقل بكتير من اسعار العجول هنا.
وكمان اللحمة وسعرها هيختلف باختلاف عمر الحيوان لانه لو الاعمار اقل من سنتين هيبقى لحمتها اقرب جدا للبلدي عندنا
وسعر الكيلو لن يتعدى ال١٠٠ جنيه للمستهلك بأي حال من الأحوال.
المطلوب
بناشد المسئولين وكمان المستثمرين بتوفير أكبر كميات من اللحوم السوداني في السوق المصري حية أو مبردة أو مجمدة سواء عجالي أو ضاني
إحنا داخلين على شهر رمضان الكريم والطلب على اللحوم هيزيد والسعر متوقع إنه يزيد أكتر والناس مش مستحملة