سوهاج : حمدى صابر احمد
وجهت النائبة ألفت المزلاوى رساله للفنان هانى شاكر وقالت فيها في السياسة من المألوف أن تصعد كيانات علي حساب كيانات أخري ، ومن الممكن مشاهدة عائلات سياسية تقفز عاليا، بينما تتواري عائلات أخري وتسقط ، فذلك مرتبط بطبيعة المنافسة والجهود المبذولة وأحيانا الألاعيب والتغييرات في قواعد اللعبه وطبيعتها، أما الفنون والذوق والمزاج الفني فمن الصعب أن يحدث ذلك بسهولة ؛ فجمهور هاني شاكر مثلا لن يستبدله بحسن شاكوش وجمهور كاظم الساهر غالبا لا يعرف حمو بيكا، وإن كانوا بيسمعوا عنه فهم قطعا يعرفون الفرق جيدا بين الاثنين اللي هو زي فرق السماء والأرض.
إذن ما الذي حدث ولماذا يحصد هؤلاء المهرجين ملايين المشاهدات؟!
اللي حصل أن الذوق والمزاج والدندنه كانت مرتبطة ارتباطًا وثيقًا بالنفسية الحلوة والأجواء الهادئة ودفا البيوت والاطمئنان علي بكره والمستقبل، ساعتها تجتمع الأسرة لمشاهدة حفلة لأم كلثوم أو سهرة عود وطرب لعبدالوهاب أو غنوة حلوة لوردة من ألحان بليغ حمدي ملحن الروائع.. دا اللي كان بيحصل زمااان لما كنا أقل عددًا وأكثر عملًا وأعلي شأنًا .. وعاوزنا نرجع زي زمان قول الزمان أرجع لزمان !!
لما غابت الأسباب التي تتفتح معها شهية الاستماع للجملة الموسيقية واللحن البديع والشعر الموزون المُقفّي وأصبحنا في عالم مشحون بالنزاعات والتحديات والانشغالات وكثرة التساؤلات والمخاوف والأزمات ، فقدنا مع كل ذلك الشغف والرغبة في "ترويق"المزاج وابتعدنا عن الكلمة واللحن وعذوبة صوت المطرب.
وبينما نحن نبتعد عن ذلك -رغما عنا- كان حسن شاكوش يستعد بإطلاق قذيفته المباغتة الأولي علي أذان المصريين السَمّيعة فكان مهرجانه الصاخب "بنت الجيران.. شغلالي أنا عنيا.." فألتف حولها العالمين وحصدت مئات الملايين من المشاهدات وانتقلت علي فلاشة عدد من ملايين التكاتك التي ساهمت بدورها في إتلاف الشارع وتدمير النظام المروري، والعديد من حوادث الخطف والسرقة، حسن شاكوش خدنا علي "خوانه" زي بالظبط رجال الاعمال لما خدوا الدولة كلها علي خوانه برضه وملوا البلد بالتكاتك الضارة فزادت معاناتنا..
المراحيض الفنية اللي طفحت في بر مصر كان لازم نقفل عليها من بدري ومن المنبع ونوقفها ونطاردها ونمنعها ونتكلم مع إدارة اليوتيوب ونقولهم هذا المحتوي غير هادف وغير مرخص له في مصر وغير مقبول إذاعته ونزعق جامد ونكبّر الموضوع -أغلب الناس مننا راحت تسمع أغانيهم عشان يشوفوا بتقول إيه الأغنية اللي واخده ٣٠٠ مليون مشاهده دي- ولو منفعش مع إدارة اليوتيوب الكلام ده.. نصدر احنا قانون لتجريم إفساد أذواق المصريين الفنية والإفساد أقوي من الفساد نفسه واللي إحنا كلنا شايفين إن مصر مش هتكون "آد الدنيا" بجد غير لما نتخلص منه .. وفي كل حاجة حضرتك.
وطبعا القانون دي نبدأ نتكلم عنه بعد ما نعمل قوانين للتعليم ونشوف أزمة الـ ٣٦ وأوائل الخريجين وحملة الماجستير والدكتوراة وقانون الإيجارات الجديد وقانون العمل والنظر في جدول الرواتب ونعمل فترة انتقالية وتعديل علي قانون المعاشات ونطمن أن الشعب كله إتطعم من كورونا وخد اللقاح في كتفه ونشوف حل للأسمدة اللي ناقصة اللي هيه أكيد أهم من شاكوش وبنت الجيران.