بقلم : الدكتور أحمد حمدى
جاتني اسئلة كتير عن طريقة تسييح اللحوم بعد التجميد فيه تلات طرق لتسييح اللحمة الافضل وهي رف التلاجة يعني انقل كيس اللحمة من الفريزر ل رف التلاجة من تحت صحيح ده هياخد وقت وعلشان كده ممكن احط اللحمة من بالليل قبل يوم الاستعمال لكن الطريقة دي هي اكتر طريقة بتضمن سلامة اللحمة وكمان امكانية اعادة تجميدها او حتى لو كنت هنساها او غيرت رأيي واجلت استعمالها ممكن تفضل ل 3 أيام من غير ما يجرالها حاجة.
الطريقة الثانية وهي المياه الفاترة مش السخنة وف الحالة دي ماينفعش ارجع اللحمة الفريزر تاني وكمان لازم اغير المياه كل نص ساعة علشان درجة حرارتها بتتغير وكمان لازم اضمن ان كيس اللحمة يبقى مقفول كويس ومابيسربش مياه للحمة.
الطريقة الثالثة ودي بصراحة ما بفضلهاش وهي الميكرويف. لان ف الحالة دي لازم تستخدم اللحمة ع طول لان فيه اجزاء منها هتبقى سخنة ومعدة للطهي. وطبعا ما ينفعش ارجعها الفريزر لو غيرت رأيي ومش هستعملها.