كتب : الدكتور أحمد حمدى
تعد عادة غسل اللحمة قبل طهيها من أخطر العادات التي تقوم بها ربة المنزل وهي تظن أنها جزء من النظافة للطعام، ولكن أكد الخبراء الصحيون الأمريكيون أن غسل اللحمة قبل الطبخ يمكن أن يسبب مشاكل صحية خطيرة.
فيما قال الدكتور احمد حمدى مدير مجازر سوهاج اللحمة مش بتتغسل نقول تاني اللحمة مش بتتغسل ضروري يا جماعة متغسلوش اللحمة والناس اللي هتقول ده قرف ومليون إيد مسكت اللحمة قبل ما تشتريها والذباب والملوثات اللي حولينا .. هقولك ده أهون ألف مرة من غسيلها طب ليه هنقولكم ليه
أولاً : اللحمة لما بتيجي عليها ميه بتزيد من نسبة الرطوبة فيها و ده اللي بتعشقه البكتيريا عشان تكبر وتتكاثر فيها
ثانياً : لما بنغسل اللحمة بتفقد البروتينات في الميه وكمان المعادن اللى كانت موجودة فيها فا بتبقى عاملة زي الألياف قيمتها الغذائية بتكون قلت جداً
ثالثاً : لما بتتغسل اللحمة وتيجي تمسكيها بإيدك .. لو في أي بكتيريا بتلزق على الإيد وعلي سطح الحوض وكمان لما تغسلي إيدك والحوض بالصابون مش بتعمل أي حاجه وبتفضل البكتيريا عايشة وتيجي تمسكي بإيدك الخضراوات والأكل التاني كده انتي بتنقلي ليها البكتيريا علي طول .
رابعاً : في حاجه اسمها لاكتيك أسيد و ده مهم جداً لإنه بيموت كمية معينة من الأمراض زي البروسيلا ولما بتتغسل اللحمة بيروح اللاكتيك أسيد ده و ساعتها أهلا بالبروسيلا
خامساً : و ديه مهمة جداً اللحمة مش بتتغسل قبل التجميد أو بعد التجميد تاني مش هنغسل اللحمة ولا قبل ما تحطيها فى الفريزر ولا حتى بعد ما تخرجيها من الفريزر ، و لما تيجي تسلقيها هتقطعي الكيس بتاعها من بره وتنزلي باللحمة فى المية اللى هتتغلي فيها من غير ما تلمسيها من غير ما إيدك تيجي عليها ، و درجة الحرارة اللي هتستوي بيها قادرة إنها تموت معظم البكتيريا ده إذا مكنتش كل البكتيريا وخاصة البكتيريا اللي بتعمل تسمم غذائي زي السالمونيلا والكامبيلوباكتر عند 70 درجة شوفي بقه لما تكون اللحمة عند 100 درجة لمدة ساعة ولا ساعة و نص هتخلي اللحمة نضيفه ازاي.