كتب : حمدي صابر أحمد
استغاث الفنان شادي خفاجة بوزارة الصحة والسكان ومجلس الوزراء المصري، لإنقاذ والده بعد تدهور حالته الصحية نتيجة تعرضه لإهمال طبي بمستشفي عين شمس التخصصي.
ونشر شادي خفاجة عبر حسابه الشخصي بموقع التواصل الاجتماعي “فيس بوك”، مجموعة من التقارير الطبية الخاصة بوالده وصور للإهمال الذي وصل إليه والده، وعلق قائلا: “أنا مش عاوز أبويا يموت، أرجوكم ساعدوني”.
وتابع: “إمبارح أبويا بدأ يخرف ويفقد الوعي وبدأ يدخل في غيبوبة، كلمت الدكتور الجراح بتاعه بقوله “أبويا بيموت، رد عليا يقولي: اعمله ايه؟، الدكتور الجراح اللي عمل عملية ملوثة بيقول على العيان بتاعه اعمله ايه، أنا أبويا بيروح مني بسبب أخطاء الأطباء ومستشفى عين شمس التخصصي”.
وأضاف: “أبويا دخل يعمل عملية فتاء في الصدر وركب شبكة بتاريخ 5 أغسطس بمستشفى عين شمس التخصصي ونصبوا عليا قالولي ادفع 25 ألف جنيه تأمين واللي هيتبقى بنعملك بيه استرداد، فوجأت بعد العملية بفاتورة بـ90 ألف جنيه، اتصرفت ومكتب رئاسة الوزراء الأستاذ مصطفى مدبولي والدكتور أشرف ذكي جابولي قرار بتخفيض 30% من المبلغ و كتر ألف خيرهم بأمانة وربنا يبارك فيهم”.
وأضاف أبويا فضل يتابع مع الدكتور الجراح أحمد عادل عباس عبد الشافي، جامعة عين شمس، في عيادته وفي المستشفى وجرح أبويا دون تحسن مع فقدان الشهية وحالة إعياء عامة جسديا وده بسبب إن الجرح ملوث جدا من العملية والنتيجة إن الدكتور طلب حجزه ودخوله عمليات مرة تانية في مستشفى عين شمس التخصصي مرة تانية، وكلفتنا 10 الاف جنيه مقابل يوم واحد فقط وخرج على البيت، ومن يومها الدكتور بيبعت تمريض يغير ع الجرح وبيتابع معاه ولكن دون جدوى أو تحسن وده منظر الجرح والحال اللي أبويا وصل ليه”.
واستكمل: “أبويا حرفيا بيموت مني ومش قادر أعمل إيه أنا وأخواتي، إحنا من إمبارح في مستشفى الدمرداش، لإني مش هقدر أدخل تاني عين شمس التخصصي ويتعمل عليا نصباية زي كل مرة وعدى على دخول أبويا 24 ساعة في الدمرداش ورامين أبويا في غرفة فيها 6 مرضى بدون تكييف أو مروحة وده خطر جدا على الجرح في الجو ده، ومفيش لا تمريض يركب له محاليل تغذية وريدية ولا في دكتور جراح يبص على حالة الجرح، والتلوث اللي هو وصل له نتيجة العملية والدكتور نفسه اللي عامل العملية مش عاوز حتى يجي يبص على الحالة بتاعته، بالرغم من إنه شغال برضه في مستشفى الدمرداش”.
واختتم: “معقول ده حال المستشفيات في مصر وفي النهضة اللي البلد فيها دلوقتي، ولو أنا مش قادر ادفع 90 ألف جنيه في مستشفى خاص، هترمي زي الكلب كده في مستشفيات بلدي الجامعية اللي المفروض سمعتها مسمعة في الوطن العربي كله”.
أرجوكم أبويا والله هيروح مني لو مالحقتوش في الـ24 ساعة دول، شير أرجوكم على أوسع نطاق، دي صور تقارير العمليتين اللي اتعملوا في عين شمس التخصصي ودي صورة بطنه من أسبوع والصورة التانية حاليا.
