كتب : حمدي صابر أحمد
أعلن الفنان أيمن مصطفى أن عيادة تجميل أسنان خاصة بالدكتور نانسي محمود، متكفلة بعلاج الشاب أحمد عمر، صاحب واقعة التنمر خلال اختبارات القدرات بكلية التربية الرياضية جامعة كفر الشيخ، والذي تفاجئ بتنمر لجنة اختبار القدرات عليه، ورفضه بسبب شكله حسبما قال.
وطالب أيمن أصدقائه على صفحته على موقع التواصل الاجتماعي “فيس بوك”، بمساعدته في الوصول إلى أحمد بقوله: “اللى يعرف أحمد صاحب واقعة كلية التربية ياريت يوصلنا بيه أو يعمل مينشن ليه”.
وتابع الفنان الكوميدي في منشوره: عشان يعرف إن عيادة تجميل أسنان الدكتورة نانسى محمود متكفلة بعلاجه كامل، سواء جراحات او تجميل أو أي مشاكل فالأسنان أو اللثهة وهوليود سمايل كمان وهندلع المسائل”، مازحا: “ونرجع للكليه نغيظهم ونحدفهم بالطوب ونجري.
حيث أثيرت خلال الساعات القليلة الماضية، حالة من الجدل الواسع، بعد اتهام شاب للمسئولين في كلية تربية رياضية، بالتنمر عليه وعدم قبول أوراقه في الكلية لوجود إصابة في وجهه.
وقال الشاب أحمد عمر، في منشور عبر صفحته على “فيس بوك”: “أنا شكلي قبيح.. موقف حصلي النهارده وانا بقدم كلية تربية رياضية..
رحت الساعة 9 الكلية عشان أقدم الورق وادخل الاختبارات وقعدت انزل واطلع من الساعة 9 للساعة 1 وبعد كدا قعدت ساعة على ما دخلوني ودفعت 450 جنيه الأول غير الورق اللي صورته، وبعد كدا دخلت وقلعت بلبوص لامؤخذة ماعدا البوكسر وبعد كدا قست الطول والوزن وطلع مناسب جدا وبعد كدا رحت للدكتور التاني عشان الاختبار.. انزل عشره ضغط.. أقف على مشط رجلك ونط.. اقعد واقف وانت مربع من غير ما تسند، وبعد كدا قالولنا ننزل الكمامه وبعدها لقيت نظراته ليا اتغيرت وقعد مركز معايا شوية ومركز في شفتي أوي”.
وتابع: “بعدها ندهلي قالي اسمك أي قولتله كذا كذا يادكتور قالي أيه اللي في شفتك دا.. قولتله عمليه حضرتك وبعد خمس شهور بالكتير هعمل عملية تانية وشفتي هترجع طبيعيه وهشيل التقويم وهبقا زي الفل.. فقالي طب ارجع تاني وقفت مع زمايلي فلقيته قالهم روحوا انتو للخطوات اللي بعد كدا وقالي أقف انت عاوزك.. طبعا أنا استغربت.. اللي هو في أي وبعدين ايه البصات اللي بيبصهالي دي، فبعد ما ذنبني شويه قالي تعالى.. فروحت قالي روح البس هدومك وروح.. قولتله ليه يا دكتور دا أنا حتى لسه ما دخلتش اختبار الجري ولا حتى الخطوات اللي بعد كدا.. قالي انت شكلك مينفعش.. قالي عشان مصلحتك بس قولتله الكلية كلها حركة وجرى وسباحه ولو في بوكس وملاكمة فانا بقول لحضرتك أنا بعد خمس شهور كل دا هيبقا زي الفل.. قالي انت كشكل أصلا مينفعش يبني وبعد كدا قالي يلا اتفضل روح البس وروح”.
واستكمل: “طب اقسم بالله إن كان معايا واحد ميقلش عن 120 كيلو واتقبل عادي… نزلت سألتهم وقولتلهم عاوز الـ450 بتوعي عشان امشي لأني لسه حتى مدخلتش الاختبارات ولا عملت أي حاجه يعني دفعتهم عالفاضي، الاقي الأمن يقولي بح ياباشا كان فيه وخلص مينفعش تاخدهم تاني.. طلعت لحد مهم فوق في مكتبه قالي طالما كتبت اسمك عالظرف يبقى متعرفش تاخدهم.. قولتله تمام بس أنا اصلا مدخلتش الاختبارات يعني لو دخلت أوك إنما أنا مدخلتش.. إن جيت للحق معاملته كانت في منتهى الاحترام بس على كلامه أنه ميقدرش يعمل شئ، نزلت وأنا مش مسامح في الفلوس طبعا.. اللي موتني أن أنا ليه متقبلتش.. علشان شكلي مش لايق عالكليه على كلام اللي كان فوق في الكشف الطبي.. يعني أنا قبيح.. بلد ماشيه بالعنصرية طول عمرها.. أنا وأنا طفل ياما خدت تريقه واتعنصرت عنصره هدت آمالي وطموحاتي في حاجة أنا مليش ذنب فيها.. والله مش أنا اللي خلقتني عشان أكون وحش في نظركم.
