كتب: أحمد صقر
أنا فان بيرسي، الفتى الطائر أو صاحب أفضل قدم يسرى، قول زي ماانت عاوز تقول، مين كان يصدق أن شاب زيي بعد مالعب مع ارسنال واتمرن مع فينجر 8 سنين، أول مايجيله عرض من مانشيستر يونايتد يوافق على طول علشان كمان يتمرن مع السير، أنا كابتن منتخب هولندا في أخر كأس عالم وأنا صاحب أخر دوري دخل خزاين مانشيستر الحمرا، طب تحبوا أحكيلكم حكايتي؟؟
بدأت حكايتي مع فريق فينورد للشباب سنة 98 كنت طفل هزيل جسمه مايسعدوش أنه يلعب كرة قدم، بس قدرت أكون مميز وسط فريقي، فضلت معاهم 3 سنين وقدرت ألعب زيهم فالفريق الأول، لحد ماجالي حلمي الأحتراف، ومع مين مع أرسنال في جيل كان بيضم عظماء في الوقت ده تيري هنري وبيركامب، وبيدربنا فينجر لعبت هناك 8 مواسم، قدرت فيها ألعب 194 ماتش واسجل 96 جول، وقدرت أحقق بطولتين الدرع والكاس مع نادي الشمال، بعد ماكنت جاي بديل لبيركامب اللي مشي من الفريق في 2006.
وفي انتقالات الصيف 2012 قدرت أروح مانشستر يونايتد مقابل 24 مليون جنية إسترليني ولمدة اربع مواسم. وأقنعوني أني ألبس الرقم 20 علشان أساعدهم على إحراز لقب الدوري ال20، والمرة الأولى اللي شاركت فيها كانت لمدة 22 دقيقه بس قدام إيفرتون وخسرنا الماتش ده بعدها قررت أني لازم أكون عامل مساعد في إحراز اللقب ومااخذلش السير وبعد خمس أيام ومع أول تسديدة سجلت أول هدف ليا وقدرنا نفوز على فولهام 3-2.
أما يوم 22 أبريل 2013 فده يوم لايمكن يتمسح من ذاكرتي أنا بعشق كل دقيقة لعبتها اليوم ده قدام أستون فيلا اللي قدرت أسجل فيها هاتريك منهم هدف مثير للإعجاب في الشوط الأول وأكد على إحراز لقب الدوري 20 لمانشستر يونايتد، لعبت بعدها مع مانشيستر قدام أرسنال في بيتي القديم دخلت ستاد الأمارات وأنا بطل الدوري ولاعبي أرسنال واقفين ليا ممر شرفي.
أما مع الطواحين الهولندية فأنا لعبت معاهم في كأس العالم 2006 وكمان أحرزت أول أهدفي ضد منتخب ساحل العاج في الدقيقة 23 من المباراة.
شاركت ككابتن للطواحين في كأس العالم 2014 في البرازيل وأحرز هدفين في مباراتهم مع إسبانيا والتي انتهت 5–1 لصالحنا اللي أعتبرها العالم كله رد على نهائي 2010، وسجلت هدف في مباراة أستراليا، وأمام البرازيل في مباراة تحديد المركز الثالث التي انتهت 3–0 لصالح الطواحين الهولندية.
أنا شايف أن كتير ممكن يعتبروني لاعب عادي، وأني أكون روحت أرسنال دكة لبيركامب، بس أنا مبسوط بمسيرتي، وطاير من الفرح أني أتمرنت مع فينجر وفيرجسون، أنا الفتى الطائر، وعمر رجلي الشمال ماخيبت، أنا لعبت لأرسنال بحب، بس أنا كنت بعشق مانشيستر، أنا واحد من ملهمي منتخب الطواحين، أنا روبن فان بيرسي.