بقلم: حسين الحانوتي
الناس اللي دايما تقول الكلمتين دول وبيعتبروهم مثل وقت الخيبه ووقت انهيار آمالهم وتطلعاتهم ميعرفوش مين الدو ولا مين شاهين رغم انهم من مشاهير زمانهم في عالم الكوره اللي انا مبحبوش ولا بهواه..
الدو واحد من مشاهير حراس المرمي.. ورغم أنه مش مصري إلا انه اثر في نفسية المصريين، وخاصة مشجعي نادي الزمالك لأنه كان سببا في حصول النادي على أول بطولة دوري له سنه1959وبرضو حصل علي الكاس عشان كده ترك اثر وبصمة.
أما شاهين ورغم أنه كان مصريا أصيلا فإنه أيضا كان سببا لحصول النادي على الدوري والكأس.
الدو وشاهين أثروا وحفرو في تاريخ الكوره والناس زمان كانت بتقول شالو الدو وحطوا شاهين دليل علي البطوله مش الانهزام والانكسار او ضياع التطلعات والآمال والطموح.. مع مرور الوقت بقي الدو وشاهين مثل عند المصريين بيتقال في الخيبة والمصيبة والانكسار أو أن الشخص اللي راح زي الشخص اللي اتحط مكانه لا بديل ولاهدف ولا رؤية ولا تطلعات وإصلاحات.
بقت الناس تحس بالخيبة والإحباط في أي قيادة تيجي مكان قيادة أخرى لأن اللي راح رغم حساسية مكانه ومنصبه مقدمش جديد ولا وصل لتطلعات وطموح الناس
كتير منهم همه التصوير والشو رغم أن وسائل الاتصال حاليا بقت فضيحه لكل من كان ولكل مسؤل وبقي اي حد يشوف اي تقصير بيصوره ويوصله للمسؤل والمسؤل يغمض عين ويفتح عين ويعمل مش شايفه ويروح وادي تاني خالص بعيد عن آمال الناس ومشاكلهم.
النهاردة مشاكل الناس مش اكل وشرب بس ولا كهربا وميه ورغم ان بلدنا حلوه وعلي اي وضع اهلها بيحبوها وبيعشقوا ترابها الا أن ربنا ابتلاهم بقيادات تتغير علي نفس الكرسي بنفس الفكر والروتين العقيم بل دايما يفكروا عكس احتياجات الناس.. وكأنهم ركبوا المنصب عشان يدورو إزاي يقرفوا الناس ويزهقوهم
مشاكل الناس الأيام دي غير زمان والناس دايما رغم شكواهامن الاسعار الا ان عندنا المشاكل العامة الأكثر أهمية واللي تخص عموم الناس حتي اللي بيشكوا الأسعار والغلا.. التعليم والصحة من أهم مشاكل المجتمع تغيير ثقافة الجيل اللي طالع اهم من الأكل والشرب لأنها هوية يجب ألا تطمس حفاظا علي البلد.
تغيير الثقافة عن طريق التعليم اللي باظ بيعطي انتماء وحبا للبلد لأن جيل الأيام دي زي ما كلنا شايفين فاقد الهوية ومصاب بانفصام وانفصال ومش هيقومه ويرجعه لهويته المصرية الأصيلة الا التعليم ودا من اهم اولويات اي مسؤل يركب كرسي
ميبقاش مهمته إزاي نلم القمامة وازاي نفتح مدرسة وهي أساسا مفيهاش مدرسين أو نفتح مستشفي وتاني يوم نلاقيها مقفولة لأن المسئولين كلهم بيسددوا الأماكن لظروف زيارة البيه الكبير.
يجب أن يكون التعليم والصحة أهم أولويات أي مسئول لأن دول أساس التغيير وأساس النهوض وهم اللي هيخلو اي مسئول له ذكرى في التاريخ زي الدو وشاهين.. والتاريخ شاهد على كل من أثر في النهوض بالتعليم والصحة على مدى الزمن.. تذليل عقبات أي مصلحة فيها روتين والناس كبير وصغير بيطلع روحه لما يخلص مصلحة أو يوقع او يستخرج ورقه فمهمة المسؤل القضاء علي الروتين فيها بتذليل وتقليل القوانين لإنهاء مصالح الناس.
اختصارا يجب أن يتغير فكر وثقافة أي مسؤل وميبقاش مرتبط بروتين عقيم موقف حال البلاد والعباد وأن يكون هناك لا مركزية في القرار بدون مخالفة قوانين الدوله للصالح العام ورؤية تغيير الواقع لأن الناس بيجيلها حاله عكسية من المسؤل إما أن يؤثر فيهم ويساعدوه لو رؤيته في صالحهم أو أنهم بيكونوا سبب في فشله لأنه لم يفكر في تطلعاتهم وقراراته عكس آمالهم .. التفكير الجدي في تغيير الثقافة العامة للحفاظ علي المال العام للدولة ولعودة الشارع لعهده من الأمن والأمان وبث روح الاصول بتاع زمان في الأجيال الصاعدة.
ومازلت أكرر التعليم والصحة أساس نهوض أي دولة فليضعها كل مسئول نصيب عينيه عشان نرجع عهد الدو وشاهين اللي التاريخ زوره.. وقتها الناس هتعرف مين الدو ومين شاهين.