بقلم: أحمد فوزي
رسالة لكل أم.. علمي ابنك إن الرجولة شخصية قوية مش جسم قوي وعضلات.. إن الصوت العالي عيب للولد والبنت مش البنت بس.. إن الراجل يعني مسئولية مش سيطرة وحب تملك وأنانية.. إن الحنية مش ضعف دى صفة إنسانية جميلة.
احضني ابنك وبوسيه، ما فيش حاجة اسمها بتدلعيه مش هيطلع راجل، الحب مش دلع.. الولد والبنت محتاجين يحسوا بالاشباع العاطفى.. اوعي تقولي له ماتعيطش انت راجل !
الرجولة مش جمود وتبلد مشاعر.. الدموع مشاعر.. اسمحيله يعبر عنها علشان يبقى إنسان يقدر مشاعر الآخرين ويشعر بآلامهم ويتعاطف معاهم.
علمي ابنك يحضن أخته ويبوسها من وهما أطفال صغيرين و أنه أمانها وضهرها وسندها وأقرب صديق لها تحس معاه بالأمان وتحكيله وتستشيره فى كل حاجة بدون خوف أو قلق وهو كمان يعتبرها صديقته ويفضفض معاها، وياخد رأيها وما يبقاش بينهم أسرار.
علميه ان هو وأخته زي بعض ما فيش فرق في المعاملة أو الحب أو الصلاحيات أو العيب أو الحرام والحلال.. الولد والبنت جزاؤهما عند ربنا، واحد فى الغلط والصح.
علمي ابنك عيب يشوف أمه بتنظف وبتؤدى كل شغل البيت هو قاعد يتفرج على التلفزيون او يلعب لازم يساعدها ولو بحاجات بسيطة.. عيب يشوفها شايلة وماياخدش منها، ولو محتاجة حاجة من بره يعرض عليها إنه ينزل يجيبهالها.. علمي ابنك يشيل الأكل مكانه ويغسل طبقه ويوضب سريره ويرتب دولابه ويعرف يشغل الغسالة وينشر هدومه مش عيب.
عرفي ابنك أن الحاجة مش بتيجي بالساهل وأن زي ما بيحصل على طلباته لازم يتعب ويبقى له دور.. لما تقولي له يعمل حاجة استني لما يخلصها ما تستسهليش وتخلصيها بداله علشان مايتعودش يبقى اعتمادى يستسهل ويرمي على غيره.. فهميه يعني إيه واجب وأصول ويعني إيه صلات عائليه وسؤال على الكبير و المريض.. علميه يجامل أصدقائه وأهله وجيرانه وزملائه فى الحزن قبل الفرح.
علميه يقف للكبير و يحترمه ويساعده لو احتاج.. خليكي قدوه في معاملتك لأهلك وقولي لهم حاضر ومن عنيا لما يطلبوا منك حاجة تعمليها أو تجبيها لهم بحب وطيب خاطر.. لو بتراعي والدك او والدتك خليه يشارك معاكي ويقعد معاهم و لو ربع ساعة ويعرف أن ده حقهم عليكم مش فضل منكم.
اتكلمي معاه واحكي له وخدي رأيه وحسسيه ان رأيه يهمك من وهو طفل صغير علشان لما يكبر يحكي لك وياخد رأيك ويتعود أنه يتكلم معاكى.
امدحيه قدامه وقدام الناس، قولي أنا خلفت راجل ووراها الصفه اللي بتشجعيه عليها: أنا خلفت راجل بيساعد أمه... أنا خلفت راجل بيحب أخته... أنا خلفت راجل بيحترم أبوه.. أنا خلفت راجل بيوعد ويوفي.. أنا خلفت راجل بيساعد اى حد محتاج له بحب ورضا.. أنا خلفت راحل بيفهم فى الأصول وعنده قيم وأخلاق ودين.. ربي راجل بمعنى كلمة رجولة وليس ذكرا.