كتب: عماد عبد الناصر- آية محمد
قال الكابتن أحمد حسن لاعب الكرة المعتزل والمدير الفني السابق لبتروجت، عبر موقع التواصل الاجتماعي فيس بوك، إن الأستاذة ريهام سعيد خرجت علينا وقالت بالنص "الناس التخينة ميتة، عبء على أهلها وعلى الدولة، وبيشوهوا المنظر"، "منظرك بيكون مش حلو وأنت بالعباية أو الجلابية ومش قادرة تمشي، بتفقدي جزء من أنوثتك".
وتابع أحمد حسن: "بصي يا ريهام هكلمك عملي وبدون تنظير.. شايفة الست القمر السمينة دي! تبقى أمي وفي زيها ملايين من أمهاتنا واخواتنا العظيمات إللي جابوا رؤساء وعلماء ومبدعين ورياضيين وفنانين وإعلاميين للأسف انتي واحدة منهم وناجحين في كل المجالات في البلد.. الناس دي تعبوا وشقوا وعرقوا واشتغلوا وقعدوا على ولادهم وعلموهم وحاجات كتيرة فى مشوار الحياة، الأمهات دول بركة حياتنا.. وكفاية دعوة واحدة بس منهم تريح القلب وتفتح الأبواب المقفولة الناس دي اللي انتي متعرفيش عنهم وعن ظروفهم حاجة انتي اتكلمتي عنهم بسوء لأنك باختصار معرفتيش قيمتهم ولا هتعرفيها لأن الناس اللي وصفتيهم بالميتة دول مبيموتوش حتى ولو رحلوا عن الدنيا لأننا بنعيش بكل حاجة حلوة علموها لينا وسابوهلنا وبيسبوهلنا".
وأضاف: يا ألف خسارة على الإعلام اللي بدل ما يعلم وينصح ويقدم رسالة محترمة بقى يسخر وينظر على الطيبين اللي فاضلين في حياتنا.
واختتم: نصيحة لوجه الله على الملأ زي كلامك ما كان على الملأ .. راجعي نفسك وحاولي تعتذري لكل الناس اللي زعلتيهم جايز يسامحوكي.