استغاثت إيمان حمدي، مواطنة منوفية، عبر جريدة الخبر المصري، بمحافظ المنوفية ومدير الأمن والجهات التنفيذية؛ لدخول مرافق المياه والكهرباء وغيرها لشقتها التي حصلت عليها هي وأولادها قانونيا من الحكومة ضد طليقها وحماها.
وقالت المواطنة في استغاثتها، من خلال خدمة صحافة المواطن: "أنا اسمي إيمان حمدي من المنوفية مركز الباجور بهناي.. مطلقه معايا طفلين ولد وبنت.. الحكومة مكنتني من الشقة، بس لقيتها من غير أبواب ولا شبابيك ولا سباكة لا في الحمام ولا المطبخ، بالإضافة إلى قطع المياه والكهرباء، ولا يوجد عفش ولا أي حاجة.. أثناء وجود الشرطة جبت باب الشقة وكالون من جيبي الخاص وكالون لباب البيت الرئيسي، بعد ما الشرطة مشيت نزلت أجيب مياه لعيالي لقتهم غيروا الكوالين.. حمايا شتمني كان هيمد إيده عليا لولا جريت وطلعت لعيالي واتصلت بالشرطة جت ولا عملت أي حاجة، وحررت محضرا ويبقى الحال على ما هو عليه".
وتابعت إيمان: "أنا دلوقتي قاعدة في الشقة أنا وعيالي من غير مياه ولا كهرباء.. عيالي بتنام على الأرض.. حمايا مانع أهلي يزوروني، ومنعني أدخل سرير لعيالي أو أي حاجة.. أنا جيت انزل طليقي ضربني وحمايا كان بيشدني من إيدي وبيقولي يلا اطلعي برة.. اتصلت بالمركز جم تاني قالولي انزلي أصل احنا مش ورانا غيرك، نزلت لقيت حمايا بيقول لطليقي اجري اقفل الباب وعيالي كانت في الشقة قولت لأمين الشرطة حضرتك هيقفلوا الباب وانت واقف مردش، فجريت عشان ألحق اخش، طليقي زقني وضربني صوت أمين الشرطة قالي يلا تعالي معانا اعملي محضر قولتله ماشي بس حضرتك ملزم ترجعني الشقة تاني لعيالي، قال لأ أنا مليش دعوة بالكلام ده وقالو إحنا مش جايين تاني.. ومن ساعتها حمايا رافض أدخل مياه وكهرباء.. أنا عايزة حد يساعدني، عيالي متبهدلين، بيناموا في الضلمة.. والشقة مفهاش أي حاجة لولا مساعدة الجيران ليا كتر خيرهم كان عيالي جرالهم حاجة.. ابني عنده ٣,٥ سنوات وبنتي سنة ونصف".
واختتمت قائلة: "أنا أستغيث بالمسئولين والمحافظ ومدير الأمن.. عايزة أدخل مياه وكهرباء.. ومفيش حد يتعرضلي، أنا عايزة أربي عيالي ملهمش غيري، أبوهم مبيسألش عنهم حتى النفقة مبيدفعهاش حد يلحق عيالي داخل علينا شتاء".
