كتبت: إيمان طاهر
تسرد جريدة الخبر المصري، لقرائها ومتابعيها من عشاق القهوة، أنواعها ومذاقاتها والفرق بين كل نوع ومذاق وتأثيره في شاربها.
وهناك عدة أنواع للقهوة تختلف حسب ثقل البن وقوامه وكمية السكر.. وإليكم جميع أنواعها كالتالي:
* السرياقوسي: القهوة السرياقوسي عبارة عن 3 ملاعق سكر لكل ملعقة بن ( 3 سكر : 1 بن )؛ مبدئيا معظم عشاقها بيبقوا غالبا من محدثي القهوة الذين لم يعتادوا عليها أو من النوع اللي بيشربها كل فين وفين.. قهوة تفضلها النساء في المجمل وعموما السرياقوسي قهوة طرية لزوم الشاب الطري ف بلاش تطول فيها كتير وانتقل ع المرحلة اللي بعدها.
* الزيادة: القهوة الزيادة بتبقي 2 ملعقة سكر لكل ملعقة بن ( 2 سكر : 1 بن ).. دايما بتكون هي المدخل اللي بتتسحب فيه نحو عالم إدمان القهوة اللذيذ؛ ﻷنها قهوة سكرها الزيادة بيكسر طعم البن المر اللي لسه مبتدئ متعودتش عليه..
فيه ناس بتستمر في تناول القهوة الزيادة؛ كييفة الزيادة بيبقوا ناس ف الأغلب بيهتموا بالمظهر على عكس الجوهر.. ناس مقضينها For Fun ويحبوا يعيشوا التجربة من السطح دون التطرق للأعماق وبيقفشوا لو القهوة جاتلهم ناقصة سكر وده يدل على خوفهم من كل ما هو مظبوط أو مانو.
* المانو: القهوة المانو هي الوسط بين المظبوط والزيادة؛ ملعقة ونصف الملعقة سكر لكل ملعقة بن ( 1.5 سكر : 1 بن ).. المانو غالبا يتم اللجوء لها في حالتين: يا إما زهقت من الزيادة وعايز تنتقل للمظبوط وبتتعود تدريجيا على تقليل السكر.. يا إما إنت أصلا كييف مظبوط بس بتقعد على قهوة شغال فيها صنايعي فاشل وعمره ما عرف يظبط قهوتك ف بتضطر تطلبها مانو بنية المظبوط والتكتيك دا ناجح تماما مع القهوجية الفشلة.. المانو مرحلة انتقالية مينفعش تقف عندها كتير ﻷنها ملهاش توصيف دقيق في علم القهوه والأمزجة !!!
* المظبوط: واحد على واحد ( 1 سكر : 1 بن ).. قهوة متكافئة تماما والسواد الأعظم من المدمنين بيلعبوا في ال Category دا.. قهوتك المظبوط تدل على شخصيتك المتزنة العادلة اللي مبتحبش حاجة تيجي على حساب حاجة.. استمتاعك بطعم البن بكمية سكر متوازنة بيخلق جو من السعادة المفرطة التي لا تنتهي سوى مع آخر رشفة من الكوب مصاحبة لآخر غليون من سيجارتك.. باختصار كييف القهوه المظبوط إنسان برنس في نفسه ﻷقصى درجة.
* ع الريحة: مبدئيا؛ طالما وصلت للنقطة دي يبقى إنت مدمن عشق إدمانه وقررت تعلي ال Dose ﻷنك مبقتش تتكيف زي الأول !!! ( 0.5 سكر : 1 بن ) مع السكر اللي بينخفض تدريجيا وطغيان طعم البن ف نحن أمام قهوة صنعت من أجل Professionals Only عشان مستحيل تلاقي مبتدئين بيشربوا القهوة ع الريحة.
فيه قاعدة عامة؛ كلما قلت نسبة السكر بالنسبة للبن؛ زادت درجة جمدانك وبرنستك و مزاجك.
* السادة: تجربة مريرة.. لو مش قدها متجربش.. الموضوع أكبر من تخيلك.. تكملة الكوباية بدون ما بطنك تقلب ونفسك تقفل معناها انت كبير وقهوجى خطير.