كتبت : منى شكرى
البطله ندى محمود علام ٢٢عام حاصله على ليسانس آداب قسم علم الاجتماع جامعه المنوفيه
تبدأ قصتها عندما ولدت فى المملكة العربية السعودية مدينة الرياض وتفاجىء الوالدين بأن ابنتهم فاقده اليدين وتعاني من أنحناء فى العمود الفقري والأطراف السفلية وتعاني من الطرف الأيمن أصغر من الطرف الأيسر....
بعدها استقرت فى مصر فى عمر ٦ سنوات فى محافظه المنوفيه مدينة شبين الكوم قرية ميت خاقان وألتحقت بالمدرسه بعمر ست سنين
تقول ندى بابا وماما السبب الرئيسي بعد ربنا ان اوصل لتحقيق هدفي... دخلت المدرسه الابتدائية مدرسه سيدي عبد المنعم والحمدلله مكنش في اي عائق بالعكس كانوا فخورين بي ماما كانت بتوديني المدرسه هي وبابا وتيته كانت وكيله ف المدرسه هي اللي علمتني الكتابه والقرايه ومسكتني القلم برجلي... واتعلمت ووصلت ودخلت المدرسه الإعداديه (صلاح خطاب الإعدادية المشتركة) ف المرحلة دي كنت أملك كرسي متحرك كهربائي.. كنت بروح لوحدي واجي لوحدي... وحصلت ف تالته اعدادي مجموع ٢٤٨ من ٣٠٠ ودخلت ثانويه عامه مدرسه الثانويه القديمه بنات وكنت أدبي وبردو كنت بروح واجي لوحدي ايوه كنت أوقات بلاقي مضايقات من الناس بس تمام كانت بتخليني أزيد إصرار أن أحقق حلمي ف الوقت ده مدرسه التربيه الفنيه كانت بتشجعني جدا واتعمل ليا تلت معارض ف تلت سنين الثانوي واتعمل بردو ليا تبع قصر الثقافة معرض ليا وااتكرمت وطلعت التانيه ف مره ع مستوى المحافظة والأولى ف سنه تالته ع مستوى المحافظة ف الرسم وبردو ف التعليم ف سنه تانيه طلعت الخمسه من عشرة الأوائل... ف سنه تالته حاصلت على مجموع ٧٩٪ واتكرمت وقتها من نائب وزير التعليم العالي ورئيس جامعة المنوفية الدكتور معوض الخولي... اتكرمت من ضمن الأوائل الثانويه العامه كوسام لتفوقي ... بعدها دخلت كلية الآداب قسم علم اجتماع وكنت يروح واجي بالكرسي لوحدي وبردو بابا وماما كانوا دايما سندي وف ضهري وكان برغبتي القسم ده واتكرمت ف سنه تانيه من الدكاتره كوسام لتفوقي واتخرجت من الكليه الآداب قسم علم اجتماع سنه ٢٠٢٠..و من ضمن إنجازاتى ان حصلت على لقب سفيره السلام والنوايا الحسنه للمركز العربي الأوروبي لحقوق الإنسان والقانون الدولي
وحاليا ادرس ماجستير في ادارة الاعمال MBA الكليه الملكيه البريطانية......حاصله على دوره تدريب اعداد القاده...وف الرسم باخد حاليا كورس ان اتطور ف الرسم اكتر واكتر....
وعملت مقابلة مع محافظ المنوفية ووعدني أن هشتغل بس لحد دلوقت مشتغلتش للاسف . .. حلمي أن صوتي يوصل للرئيس عبد الفتاح السيسي وان يتعمل ليا معارض كبيره وان بردو ابقى من ضمن أبناء المجتمع واشتغل وابني بلدي واكون ليا إسهام أن بلدي تطور للأحسن نفسي اكون فنانه مشهوره..
نفسي أقدم البهجه لكل الناس واديهم امل وان اي فرد من ذو القدرات الخاصه يشوف الدنيا ويشارك ف بناء بلدنا
ندى تحطم قيود المجتمع وتشارك بقوة معلنه أن الاعاقه ليست فى الجسد إنما فى عقول المجتمع وقادرة على اثبات ذاتها بنجاحها الملموس.
